علق محمد سراج، عضو مجلس إدارة القلعة الحمراء على موضوع تدريس مادة النادي الأهلي في الليجا بعد الإعلان عن ذلك الأمر.
ووفقا لما قاله محمد خلال تصريحات أدلى بها إلى حسابه الرسمي على مواقع التواصل الاجتماعي فيسبوك: “حبيت اكتب البوست ده لتوضيح أمور هامة جداً عشان تفاجئت بعد خبر امبارح الخاص بالأهلي ولاليجا بمبالغة ولغط كبير وموضوع اخد اكبر من حجمه”
١- هل هو إنجاز عظيم يستاهل كل الضجة دي ؟ لأ انا شايفه عادي مش إنجاز لأن ده الطبيعي لحجم نادي زي الأهلي انه يوصل لكده وأكتر احنا بنفضل ننتقد ونجلد ذاتنا هنا لكن لما تشوفوا تعامل المؤسسات العالمية مع النادي الأهلي خارجياً واحترامهم له الموضوع مختلف تماماً
٢- لغط ان دي مجرد دراسة حالة وpresentation وخلاص لو تشوفوا الايميل المرسل من طرفهم هتفهموا كويس ان دراسة الحالة دي مطلوبة من الطلاب يعملوها بناءً على ما تم دراسته من مادة النادي الأهلي وأنهم يعملوا مشروع لأوجه تعاون بين النادي الأهلي ونادي أسباني اخر من أفكارهم وهي فكرة عجبتني وهما اللي اقترحوها برضه مش أحنا وبعد كده يتم عرض المشروعات دي على هيئة تدريس وعليها تقديرات ودرجات كما هو موضح يمكن المواعيد المخطط لها من بدري كانت في يونيو وانا اعتذرت وطلبت التأجيل فيما بعد ليوليو نظراً لظروف خاصة هل في presentation عادية تتقدم بعدين يتعمل عليها تقديرات ودرجات للطلاب
٣- لغط لاليجا والتقليل من لاليجا نفسها وانهم مجرد مركز تعليمي صغير مفيش مركز تعليمي يا جماعة بيصدر شهادات MBA معتمدة عالمياً تزيد مدة دراستها عن ال٩ شهور لازم يكون له تصريح جامعي او له شريك جامعي اكاديمي معتمد يعني انا مثلاً لما عملت ماجيستير بجامعة ريال مدريد واللي هي صرح كامل تابع لنادي ريال مدريد عاملين شراكة اكاديمية مع الجامعة الأوروبية بمدريد كشريك أكاديمي فكنا كطلاب ملتحقين بنقول اتخرجنا من جامعة ريال مدريد مش بنقول اتخرجنا من ( نادي ريال مدريد بالشراكة الأكاديمية مع الجامعة الأوروبية )
٤- مقر البرنامج نفسه انه في قطر والدول النامية لأنه لم يحقق نجاح في بلاده ده أمر أخر مضحك مش عارف مصدره ايه بالظبط في المعلومة وموضح مقر البرنامج من موقعهم الرسمي وانه في مدريد واتهامات انهم بيعملوا كده للاستفادة المادية من وراء النادي والأندية العربية هو بالعكس مكنش لهم اي طلبات مادية من النادي ومفيش أي طالب مصري أو عربي ملتحق بالبرنامج أصلاً ومعندهمش تعاون مع نادي عربي او افريقي غيرنا مش في دماغهم حتى الرحلة اللي طلعتها بالكامل من إقامة وتذاكر طيران كانت على حسابهم مش على حساب النادي تقديراً للنادي مش لشخصي وعلى فكرة تكلفة الماچيستير عندهم على الطلاب من الأعلى في العالم وتصل لحوالي ٦٠٠ ألف جنيه مصري وهو رقم كبير مقارنة بجامعات رياضية أخرى وده لجودة المحتوى والمحاضرين عندهم والرحلات الخارجية
٥-الماچيستير بيقدم رحلتين تعليميتين من ضمن البرنامج كما هو موضح كل واحدة مدتها أسبوع تقريباً ومن هنا جاء اللغط وبرضه بسبب عدم البحث الكافي والسطحية في تناول الأمور رحلة بمركز اسباير العالمي بقطر يليه زيارات للملاعب المستضيفة لكأس العالم ورحلة أخرى بنيويورك بأمريكا لكن الدراسة كلها داخل مقر لاليجا بمدريد هما نفسهم كاتبين في الموقع تواجدي داخل مقر لاليجا بأسبانيا نقوم نقول لا البرنامج والمحاضرات كلها في قطر وده برنامج ممول
٦- الصفحة الرسمية ل لاليجا هي اللي ذكرت اني المحاضر العربي والإفريقي الوحيد كما هو موضح عشان البعض برضه طلع شكك مش أنا اللي بادرت وقولت والله
٧- المنهج تضمن جزء كامل في البداية عن مصر والطفرة في البنية التحتية الرياضية بمصر وتنظيم الفاعليات الكبرى ومن ثم تطرق للنادي الأهلي بشكل مفصل الذي تم اختياره من جانبهم واختيار اسم نادي القرن في أفريقيا من جانبهم أيضاً أكيد أتمنى كوني مصري يكون في أكتر من نموذج مصري ناجح يشرفنا بس بالفعل والشغل مش الكلام ياريت
في النهاية أنا بسعى قد أصيب وقد أخطأ في مشواري الإداري أو الأكاديمي وبحاول أجتهد كفرد في منظومة عمل متكاملة داخل النادي الأهلي اتشرف بالانتماء لها وللجميع كل الشكر والاحترام من جانبي من أنتقد ومن تجاهل ومن أشاد وشجع ( بس دول لهم عندي مكانة خاصة لوحدهم).
الرئيسية