نشر المستشار محمد محمد رشوان محامي جماهير الاهلي على صفحته على موقع التواصل الإجتماعي فيسبوك بياناً مفصلاً عن قضية هامة
المستشار محمد رشوان المعروف بتوليه الكثير من القضايا الخاصة بالجماهير و عدد من رموز النادي أوضح بعض الجوانب المتعلقة بقضية حبس عدد من المشجعين الأهلاوية في مباراتي الأهلي الماضيتين في بطولة دوري أبطال أفريقيا.
وجاء نص ما نشره :
بسم الله الرحمن الرحيم.
بقالي كتير مش متفاعل ولا موجود على وسائل التواصل نظرا لانشغالي الشديد وحزني الشديد أيضا. لكن قررت اتكلم. لأن ضميري و مسئوليتي أمام الله وامام الناس وامام نفسي ميسمحوش اني اسكت كل ده.. انا مش هقول تفاصيل شغل ولا أرقام قضايا ولا ايه الي بيحصل. لأن الأحداث كتير ومتسارعه.. وانا اتعودت على شيل الحمول والقوه والجلد. معلش البوست طويل شويه لكن هحاول الخصه في بعض النقاط.
١. يارب الاهلي يكسب الترجي النهارده ويكمل مسيرته الناجحه في حضور جمهوره.
٢. انا سعيد جدا أن عدد الجمهور ١٠ آلاف بس لان ده بيقلل نسبه الخطر واخر بوست كتبته أو فيديو عملته كنت بقول نمشي بالتدريج أفضل لأن الوضع صعب.
٣. بقالي اسبوعين بتعامل مع أسر بعض الشباب المقبوض عليهم على خلفيه مباريات الهلال والرجاء وما بعد الرجاء حوالي ٧٥ اسره مصريه بتعاني وشيء صعب جدا انك تتحمل دموع أمهات وصرخات واستنجاد إباء واشقاء واعمام. وهما نفسهم موجودين هنا وعارفين إلى احنا بنقوله ده ايه..( بالمناسبه الموضوع ملوش علاقه لا بالكوره ولا التشجيع ولا حب الاهلي ولا الناس راحت تشجع اتقبض عليها لان الكلام ده كلام فارغ) . وانا اطلعت الاهالي على هذا الأمر وهما عارفين كويس وعرفوا بنفسهم ايه الأسباب. . وبدون أي مزايدات من اي حد. صعب جدا اشرح الأسباب هنا وصعب افهمك. لكن ممكن تفهم من الكلام الي جي ده..
تحذيرات مهمه لو رايح ماتش الترجي.او اي ماتش
١. بلاش تروح من غير تذكره أو فان اي دي نهائي حتى لو مين قالك هدخلك.. بلاش.
٢. بلاش تعمل بطل وتقول هاخد شمروخ وهعدي بيه وهعرف اخبيه. عشان لو اتقبض عليك اهلك هيتبهدلوا حرفيا.
٣. بلاش تعمل قائد مدرج ورئيس مجموعه لان الكلام ده ممنوع وبيتعامل معامله انشاء مجموعه محظوره وتروح فيها نيابه أمن الدوله. وده قانون رسمي نظمي.
اما لو مش هتروح الماتش. حضرتك متسمعش كلام اي انسان يقولك احرق الفان اي دي او تذكرتي أو اعمل فيديو تشتم فيه المسئولين والاداره وانت شاب صغير ابوك شقيان عليك. لأن الي خلاك تعمل كده بياذيك وبيضرك وبيضيع مستقبلك. لأن الأمن بيتعامل بكل قسوه في هذا الأمر. لأن الي اقنعك المره دي تحرق تذكره بكره يقنعك تقطع الطريق أو تحرق مبنى.متقلدش حد تقليد أعمى..متسمعش كلام حد بيسخنك. وده حصل للأسف.
٤. ممنوع تاخد معاك إعلام دول أو ترتدي ملابس فيها إشارات سياسيه أو علامه الأولتراس.. ممنوع تماما.
٥.لكل اب وكل ام ابنها لم يتخطى ١٥ أو ١٦ سنه. راقب ابنك جيدا وشوف مشترك في جروبات ايه ع الواتس أو التليجرام. مش كل واحد يشوف جروب كوره يدخل علطول لان ده خطر جدا لأنك متعرفش مين الي عامل الجروب ده وهدفه ايه.. الازمه إلى احنا فيها دي، كلها من ماتش المحله بسبب جروب على الواتس، التليجرام. اتنشر عليه تحريض ضد الدوله ودعاوي مظاهرات. فالناس، لبست في حيطه ومن غير عمد ميعرفوش . وكل كلمه بقولها انا مسئول عنها أمام الله ولابد من التأكيد على أن ده بيمثل تهديد أمني خطر. انا عارف انك هتقول ابني ميقصدش، ابني مكنش يعرف. ابني مخدش باله.. حضرتك كأب وحضرتك كام.. لازم تحذروا وتراقبوا وتشوفوا. لأن ده دورك. الأمن مش هيطبب عليك ولا هيقولك معلش. ابنك مكنش يقصد.
٦. مكالمات كتير بتجيلي. هو فين مجلس اداره الاهلي وفين الخطيب وسايب الجمهور ليه.. يمكن البوست ده يفهمك ان الموضوع مش كوره ولا مدرج.. ورغم ذلك الناس في الاداره بتحاول وبتعمل إلى تقدر عليه في لجنه اداره المباريات ومتابعين معايا . لكن عند الأمن القومي ده خط أحمر وممنوع التدخل فيه.. بالمناسبه فيه ولاد محبوسين اخواتهم في مناصب مرموقه جدا جدا. ومش قادرين يتدخلوا خلاص.. عشان بس متقولش اني بقول اي كلام.
٧. الاخبار المتداوله بشأن إخلاء سبيل بعض الشباب دول غير صحيحه. مفيش حد أتعرض ع النيابه خرج ولا صغير ولا كبير. التحقيقات مازالت مستمره.
٨. كل الاحترام والتقدير لمقدرات الدوله والسلطات المختصه في التحقيقات ونناشدهم اتخاذ القرار المناسب حفاظا على مستقبل هؤلاء الشباب. أمن مصر من أمننا وسلامه مصر من سلامتنا.. وما حدث كبوه ومحاوله فاشله من بعض الخارجين عن القانون استغلال كلمه الأولتراس وعوده الجماهير لنشر الفتنه مره اخرى. والحمدلله ان النيابه العامه رجالها المحترمين فاهمين كويس إلى حصل ومتفهمين تماما ان الولاد اغلبهم ميقصدوش التخريب أو اهانه الدوله أو الاشتراك في أي عمليه اختراق أمني. وأنهم غرر بهم عن تعمد. و انا بطلب وأرجو من جناب النائب العام النظر لهذا بعين الاعتبار وقد تقدمت بطلب رسمي بذلك.
٩. رساله بكررها لكل ولادنا.. راجع البوست ده كويس،هتفهم ليه ممكن ناس تتاخد من بيتها بإذن من النيابه العامه رغم انه محضرش الماتش،.. ارجوك متدخلش جروب وتتفاعل عليه انت متعرفوش ولا تحول لحد فلوس انت متعرفوش ولا شوفته لان ده ممكن يدخلك في قضيه تمويل وانت مش واخد بالك.. الحذر كل الحذر..متخليش حد ضد البلد يتاجر بيك
اخيرا انا قلت الي عندي وهو ده الحقيقه بالحرف ومن واقع الورق و التحقيقات ومش من خيالي. وقلت إلى محدش يقدر يقوله . لأن مليش حسابات ومبخافش. خايف على الشباب وعلى البلد. وواثق تماما ان القياده السياسيه في مصر متفهمه الأمر وحريصه على شباب مصر. وبإذن الله الولاد يخرجوا في أقرب فرصه ممكنه
عارف ان الكلام مش هيعجب إلى مش فاهم حاجه او صاحب الغرض أو إلى عاوز يولع الدنيا.. بس،انا لو أنقذت شاب واحد بس فأجري عند الله سبحانه وتعالى .
الرئيسية