كتب خالد الجوادي مترجم السويسري مارسيل كولر المدير الفني للأهلي على صفحته على فيس بوك ما شهده ويشهد عليه من معاناة في رحلة تتويج الاهلي باللقب رقم 12 لدوري أبطال أفريقيا
وهذا نص ما كتبه :
*******
الحمد لله الحمد لله الحمد لله
قفلنا الدستة يا قارة 😍 فرحة كبيرررررررة اوووووي و ملحوظات كتير:
أولا: اذا كانت القاضية أسطورية و ٢٠٢٣ ايقونية فبالتأكيد ٢٠٢٤ ملحمية … بجد ملحمة … ليه؟ أرقام ساحقة صعب تكرارها في تاريخ القارة: بطولة بلا هزيمة … اقوى هجوم … اقوى دفاع لم نستقبل غير هدف وحيد و هو رقم لم يتحقق في تاريخ دوري الأبطال منذ نشأة البطولة ١٩٦٤ … كلين شيت ١٠ مباريات متتالية … أرقام للتاريخ
ثانيا: ليه ملحمة؟ بطولة تشهد جهد خارق و بالتأكيد تعبنا فيها و شهدت جهد و عناء غير مسبوق: مرتين تنزانيا .. غانا … الكونغو … الجزائر … سفر و تعب في كل أنحاء القارة … أجواء مختلفة … طيارات بتعطل 😂 هبوط اضطراري و إقامة في أكرا … كوماسي و الكونغو أجواء كأفلام الرعب … وطاويط … رطوبة قاتلة في دار السلام … نجيل صناعي و حر خارق في الكونغو … اماكن اقامة عجيبة … برد و مطر في الجزائر … جماهير مرعبة … تشعر و كأننا فريق كوماندوز يجوب القارة و يقاتل في ربوعها و ليس فريق كرة قدم … شعوري ده أكده لي لاعبين كثر انها اكثر بطولة افريقيا تعبنا فيها بجد
ثالثا: ليه ملحمة؟ عاكستك ظروف كتير اخطرها إصابات عنيفة تهد أي فريق … و ايه إصابات شهور … فريق يخسر أعظم حارس في افريقيا و كابتن الفريق الاسطوري كابتن الشناوي و يخسر احد افضل مدافعي القارة ياسر ابراهيم شهور و يخسر امام عاشور و ديانج و السولية و رضا سليم و اخيرا الضربة القاسية بأصابة الاسطوري علي معلول … في فرق لو غاب منها واحد منهم بس كانت خرجت بموسم صفري … لكن بروح الأبطال و قيادة فنية عظيمة رغم كلللللل ما سبق بتوصل النهائي و تاخد البطولة بأرقام غير مسبوقة … مش بقول لكم ملحمية
رابعا: البطولة دي الاهلي لعب بتنوع تكتيكي مرعب … كل ماتش اتعمل فيه شغل تكتيكي و تفاصيل فنية لا يمكن حد يتخيلها … في يوم من الأيام الجمهور حيكتب البطولة دي في صفحة خاصة في تاريخ كرة القدم الأفريقية
خامسا: عشان تكمل الصورة الهيتشكوكية (نسبة إلى هيتشكوك) مباراة نهائي تكسير عظام و إثارة و شدة أعصاب على أعلى مستوى ادرينالين ١٨٠ دقيقة لآخر ثانية في ماتش النهائي ضد فريق صعب جداااااا (عكس محاولات البعض تصديره) فريق قوي منظم كسب صنداونز رايح جاي
سادسا: ماتش النهائي كلللللل اهلاوي حقيقي كان مذعور منه من داخله لأننا عارفين السيناريو و كان الكل شايفه: اللي عملناه في الوداد حيطلع علينا … كل المؤشرات عند الجمهور المتمرس بأننا امام سيناريو كابوسي … الاهلي انتصر في هذا النهائي على افكار و مؤشرات و قناعات كروية عاشت سنين … و ده كان أصعب انتصار اتحقق و هو شيء لو تعلمون عظيم
سابعا: جمهور الاهلي جمهور الاهلي جمهور الاهلي … ماتش مازيمبي بعد الهدف الملغي قدم ملحمة مش طبيعية… انا بحضر ماتشات الاهلي في الاستاد من الثمانينات و مفيش ماتش مهم ماحضرتوش لكن اللي عمله جمهور الاهلي في البطولة دي في ماتش مازيمبي و في النهائي من ايام جمهور الاهلي التي لن تنسى … مش بقول لكم بطولة ملحمية في كل شيء
ثامنا: تنظيم ماتش النهائي العالمي كان احلى تابلوه للبطولة دي … تستمر الملحمة … جهد خارق من الكابتن الخطيب و د. سعد شلبي و مجلس الإدارة لو قعدت اكتب عنه سنة مش حيوفيهم حقهم مع ناس كتير في الكواليس الناس ماتعرفهاش زي العميد علاء مدير أمن النادي و غيرهم … انا كنت بتفرج على جهدهم و مش مستوعب الحب و الجهد و التفاني و الإخلاص و الرؤية دي … قلنا بطولة ملحمية في كل شيء
تاسعا: ملحوظة … كل الناس اللي معايا على الفيسبوك كانت بتصرخ قبل المباراة ان ماعرفتش تجيب تذاكر و ان مفيش تذاكر … بعد الماتش كلهم منزلين صور لهم في الاستاد 😂😂😂 ضحكت اوي بصراحة
مبرووووووووك جمهور الاهلي العظيم و كل منظومة الاهلي على بطولة ملحمية و ياااااا رب دايما انتصارات و فرحة و ألقاب … أهلي أهلي أهلي 💪💪💪❤️❤️❤️ و اسف للاطالة
الرئيسية